السبت 9 صفر 1442 هـ الموافق 26 أيلول 2020 م

مختارات من قصائد رفيق روحانا

تاريخ الإضافة الخميس 1 أيار 2014 2:03 م    عدد الزيارات 860    التعليقات 0

      


قطعة سما لبنان



قطعة سما لبنان
بأرضو وديع خلقان
مجبول بترابو
واليوم عغيابو
تراب الوطن بردان.

يا وديع وحدك جمعت الكل
وقت الي غيرك فرّقن
منقلوبنا مافيش قوّة تفلّ
مع كلّ طلّة شمس رح بتطلّ
من عتم ليلُن تسرقُن

نيّال يلّي رافقو عصرك
حكيو معك مرّة...تلاقو فيك
زرتُن ببيتُن .. عمّروا مداميك
حجار مجدك ..
وشحدوا من للي ربنا عاطيك

ورح بيبقى يضجّ بالملكوت
صوتك لي مَا بيسَكتو موتك
ونقول بلبنان في تالوت
خالد وع جبين المجد منحوت
الأرز والحلم الرجا وصوتك.

رح ضلّ شوفك واصل لَعندي
وتستقبلك بجنينتي حفافي
وزهور وعصافير وقوافي
وعَ غمرتك يللي سبق زندي
قلبك الوديع الطيب الصافي.

رح عيش حلم يضَل
يتصبّح وجّي بوجّك
وما رح بقول بخاطرك
عمري ندرتو
تحت فيّ قناطرك
عَقلّ من مهلك اذا بدّك تجي
رح ضلّ عباب الجنينة ناطرك.

عم بتخيّل بالجنة
عَعودك تعزف الحان
والملايكة تغنّي
السما يا قطعة لبنان.


====
 


يوسف



مرّا بعت ملاك
يقلّو لهوني شبّ:
هيك بدّو الرب
سيّد الأفلاك،
هاك اللي ما بينساك.
البنت اللي بتحبّا
وعم تحلم تعمّر بقلبا بيت
حلمك رح يبقى إبن يا ريت
روح القدس بليل شمع وزيت
بأحشاءها خبّا
حالو، وأمرها يعمّر بقلبا
بيتو وهي سمعت كلام ربّا
الآخد قرار يتجسّد... وصبا
كاسات مجدو ... وقلها: محبّا
وإنت صار شغلك على السكّيت
تحميا وتمشي معا عا دربا
إنت رح تبقى خطيبا وبس
وإبنا بيربى بحضنك الغالي
وإتكالو عليك.. ما بتنمس
بين البشر بالهمس أو عالي
كرامتا. ولا في كلام يندس
ويتهما بالزور ... هي أطهر
خلق الله الساكن العالي.

====


 ي بتربح قلبي


شو ناطر ؟! يلاّ
حب ولا تخبّي
ي بتخسر هالدني كلاّ
ي بتربح قلبي
طرقات العتمي
فيك تضويا
واعدني بكلمي
لي ما بتحكيا
وينا هالبسمي؟
لمين مخبيا؟
كل البيحبّو
حبّن ما خبّو
وقلبي بيسألني لش قلبك
تاعبلو قلبو؟
طل من الغربي...
من وهم الكذبي...
من بكرا وبعدو...
من طفل ولعبي...
وع حدود الخاطر
وقصر بقناطر
لش بعدك هيك منطرني
وشو بعدك ناطر

=====


التعليقات (0)

 » لا يوجد تعليقات.

أضف تعليق

الأسم: * البريد الإلكتروني:
تعليق: *
رمز الحماية: *  تحديث الصورة

* الخانات الضرورية.

   

 

   

        

  

 

  

 

 

 

 

 

 

 

 

  

      

  

      

 

     

      

 

 

 

 

  

  

    

    

   

        

        

               

     

    

         

   

           

 «  أيلول 2020  » 
MoTuWeThFrSaSu
 123456
78910111213
14151617181920
21222324252627
282930 
إلى الأعلى

Designed and Developed by

Xenotic Web Development